Unha degustación gratuíta de tapas nos locais de hostalería participantes na ruta 'Tapa á Anguía' abriu este sábado a programación do día grande da XXIX Festa da Anguía e Mostra da Caña do País do municipio de Valga. Desde o mediodía e o longo da xornada degustáronse máis de 150 quilos do afamado peixe do Ulla, ingrediente principal dos bocados que ofreceron a decena de locais participantes nun concurso que premiou as mellores receitas.
Os ouros foron para a 'Anguía ao estilo Pontellón', elaborada polo Café Bar Pontellón, e para o 'Rolo de Anguía' do Bar Alba. En segunda posición quedou a 'Anguía na tella' de Pastelería Caprichos, e, en terceiro lugar, a 'Ópera anguía' de Cafetería Auditorio.
Entre as persoas que participaron na votación da mellor tapa sorteáronse vales de compra de 30 euros para gastar no comercio local. Os agraciados son: Encarna García Castro, Sergio Pérez Ferro, José Antonio Conde Padín, Marcos da Moral Boullón, José Manuel Martínez Gómez, Jesús Manuel García Moure, María José Pérez Ferro, Daniel Caldela Igrexas, Esteban Pereira Vexo e Andrés García M.
CONCURSO DA CAÑA DO PAÍS
Na xornada deste sábado tamén se entregaron os premios do Concurso da Caña do País. A mellor de entre as brancas foi a de Tamara Cerneira Carballeira (Forno), mentres que a de José Castiñeiras fíxose co segundo posto. A vencedora na modalidade de herbas foi a de Antonio Santiago Gregorio (Senín), quedando en segundo lugar a de Francisco Manuel Santiago Figueira (Senín). En augardente tostada venceu Antonio García Carballeda (Ferreirós), levándose tamén a prata nesta categoría Francisco Manuel Santiago Figueira (Senín).
Ademais, a festa recoñece os lugares mellor engalanados para a ocasión. Nesta edición, levou a palma Canle, mentres que Vilarello quedou segundo e Beiro, terceiro.
