O Belén Artesanal en Movemento de Valga é un dos reclamos do Nadal por excelencia da zona e as cifras demóstrano. O nacemento, aberto o 2 de decembro, rexistrou na súa primeira semana unhas 10.000 visitas, segundo cifras achegadas este luns polo Goberno municipal. A xornada festiva do pasado xoves, Día da Constitución, e o domingo 9 foron os días nos que se rexistrou unha maior afluencia de público.
O interese que esperta esta recreación do Nadal, formada por unhas 4.600 figuras, provocou que se rexistrasen colas na entrada da exposición durante as tardes e esperas de ata unha hora e media para poder contemplar a recreación presentada este ano.
Por se o reclamo non fose xa de seu atractivo para o público, a presenza das controvertidas representacións da personaxes como El Chicle e Ana Julia Quezada e, en menor medida, do camioneiro que agrediu a un grupo de ciclistas cun martelo en Pontevedra, engadiu un extra de morbo á exposición.
Na xornada inaugural achegáronse ao belén un milleiro de persoas, entre elas integrantes de cinco excursións organizadas que recalaron en autobús procedentes, por exemplo, de Vigo e Avilés.
CIFRAS RÉCORD. O xoves 6, a afluencia de visitantes deixouse notar xa pola mañá e pola tarde o número de curiosos multiplicouse ata superar as 2.300 persoas durante toda a xornada, unha cifra marca que obrigou a manter o nacemento aberto ata as 22.00 horas, cando a hora de peche establecida son as 20.30 horas. O domingo foi outro dos días históricos, alcanzándose outras 2.300 persoas.
O sábado 8 computáronse 2.100 visitas. Pola mañá, ademais de particulares, chegaron a Campaña tres autobuses de Vigo e Ourense. Pola tarde, a cola de xente bordeaba máis da metade do complexo deportivo. Visitantes de Madrid, Asturias, Burgos, Salamanca, Valladolid e varias localidades galegas interesáronse xa polo belén valgués, que permanecerá aberto ata o 13 de xaneiro para goce de nenos e maiores.
