Os acordos de colaboración e irmandamento establecidos o ano pasado entre o Concello de Caldas de Reis e a Gobernación de Caldas, o municipio colombiano de Villamaría e a Cámara de Comercio de Manizales seguen dando froitos, agora no ámbito da formación. Un curso de extensión universitaria da Universidade de Vigo, baixo o título "Termalismo: espazos termais", ensinará a profesionais e axentes públicos e privados do sector da rexión colombiana de Caldas as singularidades do termalismo galego.
O catedrático de Física aplicada da Universidade de Vigo e director do curso, José Luís Legido, presentou onte os detalles nunha reunión co rexedor caldense, Juan Manuel Rei, e o tenente de alcalde e deputado provincial, Manuel González. A formación será de 40 horas de duración e impartirase do 22 ao 26 de xullo en diferentes vilas termais e balnearios de Galicia, incluíndo unha sesión no de Caldas de Reis na tarde do día 24.
O obxectivo é abordar cuestións como o deseño e xestión de espazos como lugares de saúde e benestar, as técnicas de tratamento de balneoterapia e cosmética termal, ou a promoción e a mercadotecnia.O curso, que reserva unha matrícula de 23 alumnos para o Departamento de Caldas, conta coa colaboración da Axencia de Turismo de Galicia, os concellos de Caldas de Reis e O Carballiño, a Cátedra de Hidrología Médica da USC, o Consulado de España no Eixo Cafetero, a Asociación Balnearios de Galicia, o Grupo Caldaria, os balnearios de Compostela e Augas Santas e o centro Talaso Atlántico.
«Esta é unha iniciativa que confirma os resultados prácticos no ámbito empresarial da colaboración coa Gobernación de Caldas, coa que nos une a figura do científico ilustrado Francisco José de Caldas, fillo adoptivo de Caldas de Reis e que dá nome a esta rexión colombiana», explicou onte Juan Manuel Rei.
