"Nuns días, entraremos no selecto club de concellos que non teñen pendente de pago ningunha débeda", afirmou este martes o alcalde de Caldas de Reis, Juan Manuel Rey, nunha rolda de prensa celebrada na Casa Consistorial. O que o rexedor considera "un fito entre os municipios galegos de 10.000 habitantes" será posible o día 25, unha vez que a Corporación municipal aprobe unha amortización anticipada de 285.000 euros.
A Administración local dispón dunha partida de dous millóns de euros en varias contas bancarias, mentres que o remanente positivo de tesourería correspondente ao ano 2018 ascende a 1.481.000, agregou o alcalde, ademais de subliñar que estes datos están fiscalizados por tres vías: o Ministerio de Facenda, o Consello de Contas e o departamento municipal de Tesoureiría.
Por outra banda, Rey indicou que o período para facer fronte aos pagos é máis breve que na maior parte dos concellos, e a espera media é de 7,34 días. De "importante" cualificou o aforro enerxético logrado, ademais de recordar que a pesar de dedicarse en exclusiva á xestión local, o seu salario non procede das arcas municipais, senón da súa xubilación como funcionario da Consellería de Educación, ao renunciar ao soldo no mes de outubro de 2018.
Desde o ano 2012, o Goberno local de Caldas de Reis non subiu as taxas nin os impostos que cobra aos seus veciños e incluso aprobou algunhas baixadas, como a do IBI. E expón reducir un 95% a correspondente ás actuacións que se realicen no ámbito da Área de Renovación Integral. Juan Manuel Rey é o responsable municipal de Facenda desde hai 25 anos: trece como edil e os 12 restantes como alcalde.
