O gobernador de Caldas (Colombia), Guido Echeverri, inaugurou o Centro de Ciencia Francisco José de Caldas, coñecido polo sobrenome de Sabio Caldas, na cidade de Manizales, coincidindo co 114 aniversario da creación dun departamento que debe o seu nome ao científico, descendente de Caldas de Reis, que o nomeou Fillo Adoptivo.
O acto celebrouse o día 11 e o gobernador destacou no seu discurso os traballos de investigación e difusión sobre o Sabio Caldas desenvolvidos no municipio do que procederon os seus pais e que permitiron localizar numerosos documentos e planos inéditos en diferentes arquivos españois, dando a coñecer unha nova visión deste personaxe.
Echeverri propuxo que unha versión reducida da exposición dedicada ao científico, celebrada no Museo de Pontevedra o ano 2018, percorra todos os municipios do Departamento de Caldas.
Tamén anunciou que no novo Centro de Ciencia Francisco José de Caldas, o Concello de Caldas de Reis dispón dun espazo permanente desde o que se promocionarán os recursos deste municipio e de Galicia. Igualmente, serán facilitados os intercambios de estudantes, profesores, asociacións culturais e empresas, tal e como perfilaron ambas as institucións nas reunións e visitas que tiveron lugar durante os últimos meses.
En decembro de 2018, o gobernador de Caldas e o alcalde de Villamaría visitaron Caldas de Reis para formalizar o irmandamento entre ambos os municipios e mantiveron encontros con distintas institucións galegas para impulsar proxectos de colaboración e intercambio. Outras delegacións parlamentarias, empresariais e universitarias visitaron tamén este concello a finais do mesmo exercicio.
O alcalde do municipio termal, Juan Manuel Rey, participou no acto de inauguración do Centro de Ciencia Francisco José de Caldas e fíxoo a través dunha vídeomensaxe na que destacou o interese do irmandamento con Villamaría, así como a colaboración coa Gobernación de Caldas para o desenvolvemento de intercambios culturais e comerciais, e coa Universidade co mesmo obxectivo.
O rexedor agregou que Caldas de Reis tamén acondicionará un espazo coa finalidade de que se promocione en España a rexión colombiana.
