Caldas de Reis figura entre os dez lugares máis acolledores de España segundo o buscador de viaxes e reservas Booking.com. Esta plataforma acaba de anunciar a entrega dos premios Traveller Review Awards 2021, a través dos que recoñece o traballo dos establecementos que se comercializan por medio desta web, repartidos por todo o mundo, en base á puntuación dos comentarios que deixan os clientes logo da súa estancia.
Baseándose na proporción de aloxamentos premiados en 2021 cun Traveller Review Award, Booking, tamén determina as rexións do mundo onde os viaxeiros reciben unha atención máis amable, así como os lugares máis acolledores de España segundo os comentarios dos viaxeiros.
É neste apartado no que Caldas de Reis aparece no posto oito entre os dez mellores destinos. Na lista tamén figuran zonas rurais e cidades pequenas e medianas que destacan, todas elas, pola súa atractiva oferta turística e cultural. A puntuación para optar a un premio debe estar entre oito e dez. A nota calcúlase facendo a media dos comentarios de clientes publicados na web de Booking e a App, entre o 1 de agosto de 2018 e o 30 de novembro de 2020.
Caldas de Reis figura na relación con lugares con máis aloxamentos premiados, do mesmo xeito que Albarracín (Aragón), Mérida e Cáceres (Estremadura), Santillana del Mar (Cantabria), Úbeda (Andalucía), Arzúa, Almagro (Castela-A Mancha), Caldas de Reis, Órzola (Canarias) e Hondarribia (País Vasco).
A través de Booking comercialízanse corenta establecementos turísticos de Caldas de Reis, dos que a maioría está no nivel máximo de valoración.
Os Traveller Review Awards chegan á novena edición cun millón de establecementos premiados. O número de gañadores pon de manifesto a "dedicación e resiliencia dos colaboradores que logran ofrecer experiencias de viaxe incribles en lugares de todo o mundo nun ano de grandes desafíos para o sector turístico", sinala Booking.