Os distintos actos da programación cultural de verán organizada polo Goberno local de Caldas de Reis baixo a emblemática denominación de Cultura Quente seguirán ofrecendo propostas e creando ambiente durante as noites de verán na localidade.
Este fin de semana estará protagonizado pola música en vivo de artistas locais ou relacionados coa vila termal, aos que o Concello quere ofrecer a oportunidade de proxectarse nun momento difícil para o sector cultural debido á situación sanitaria.
Seguindo a filosofía de variar os escenarios para dinamizar todos os espazos urbanos e promover a actividade do comercio e a hostalería, o eixo central dos concertos será a Praza das Palmeiras, cuxa idoneidade para acoller este tipo de eventos quedou de manifesto coa experiencia de citas anteriores.
Aínda que a música volverá ser protagonista, o programa iníciase con literatura, da man de Mara Dres (Mónica Graña), que presentará o seu libro de poemas, titulado da forma do papel, ás 21.30 horas, na Rúa Real, fronte á Praza de Abastos. A autora estará acompañada polo escritor Rafael López Miras.
O sábado 17, nas Palmeiras, ás 21.30 horas, abrirá a quenda de concertos Diego Méndez, un músico de Vilagarcía, cantante do Grupo Claxxon, que dará paso ao do grupo Horizonte, formado polos artistas locais Ronsel Rodríguez e Manu García.
A seción do vermú dominical estará amenizada nesta ocasión pola Fanfarria Furruxa, un grupo de músicos con ampla experiencia formado en Godos, que igual interpreta un corrido mexicano que unha bachata, facendo soar os saxofones, trompetas, percusión ou tubos, sempre cun ton desenfadado e divertido.
