Logo de lograr que a aposta pola celebración dos Maios lograse a implicación dos veciños, o Goberno local de Caldas de Reis non está disposto a que a covid-19 fronte a súa traxectoria. Para evitalo celebrarase o día 1 de maio, aínda que nesta ocasión, debido ás circunstancias sanitarias, o evento organizado polas concellerías de Cultura e Xuventude, terá carácter virtual.
Levará a cabo o habitual concurso, que establece tres premios de 150 euros cada un, para o mellor engalanado, a mellor copla e a mellor interpretación. Os que non resulten galardoados contarán cunha compensación de 50.
Poderán participar todas as asociacións culturais, colexios, grupos, colectivos veciñais, entidades e persoas que o desexen.
Para iso, deberán remitir ao Concello, antes do día 27, a folla de inscrición cuberta e asinada e un vídeo dunha duración máxima de cinco minutos, no que se poida apreciar o maio así como a interpretación da copla. Tamén terán que achegar o seu texto e tres fotografías do maio.
As bases poden consultarse nas redes sociais do Concello, e na páxina web, da que se pode descargar a documentación de necesaria para inscribirse.
A concelleira de Cultura, María López, lamentou que tampouco estes anos poida celebrarse con normalidade. "O prioritario, nestes momentos, é a saúde das persoas", subliñou.
No entanto, "optamos por un concurso virtual que permita, nestas circunstancias, preservar o patrimonio cultural e fomentar o interese polas festividades e actividades tradicionais", expuxo.