Os municipios de Caldas de Reis, Villamaría (Caldas, Colombia) e Caldas de Vizela (Portugal) traballan na formalización dun acordo a tres bandas que lles permita traballar en común nos ámbitos da cultura, a educación, o termalismo e o desenvolvemento social e económico, cunha perspectiva de cooperación interregional e transnacional.
Nun acto celebrado recentemente en Villamaría puido visualizarse este obxectivo coa presenza do presidente da Asociación de Escritoras e Escritores en Língua Galega, Cesáreo Sánchez; o asesor de relacións internacionais da Gobernación de Caldas, Jonathan Ballesteros, e o alcalde de Villamaría, Alejandro Holguín
Sánchez, representando a Caldas de Reis e a Galicia, sinalou que "este acto de fraternidade e de irmandade convértese en realidade porque soñamos os mesmos soños dun futuro de paz para os seres humanos, para estas novas xeracións". "Seremos capaces de crear territorios de traballo, de tenrura, conxuntamente, para así transgredir a distancia", engadiu.
Tamén destacou as similitudes entre os tres territorios, describindo ao Eixo Cafetero como un paraíso verde e fértil, de altas montañas, alagado polo canto dunha infinidade de aves e a súa paisaxe cultural cafetero, declarado Patrimonio da Humanidade.
A literatura foi promocionada en Feira do Libro do Eixo Cafetero e en diversos actos, tal e como figura no irmandamento entre Caldas de Reis e Villamaría, formalizado en 2018. Tamén tivo un espazo a divulgación da figura do científico e ensaísta Francisco José de Caldas (1768-1816), fillo adoptivo da localidade termal, que dá nome ao Departamento colombiano de Caldas.
