Máis de 15.000 unidades de produtos pirotécnicos almacenadas ilegalmente na localidade pontevedresa de Moraña foron comisados, informa a Garda Civil.
Os axentes acharon eses produtos explosivos cando procedían a precintar as instalacións onde días antes localizaran unha nave con preto de mil plantas de marihuana.
Durante a operación, os investigadores localizaron un remolque supostamente dedicado á venda ambulante que almacenaba algo máis de 20 quilos de material pirotécnico de distintas categorías.
Entre as 15.000 unidades de produtos pirotécnicos figuran bombetas, tronos de impacto, foguetes, petardos e baterías supostamente destinados á venda ambulante.
Con todo, os axentes comprobaron que o propietario do material carecía de autorización administrativa para a súa tenencia e almacenamento, e ademais non respectaba as medidas de seguridade e protección requiridas.
O material pirotécnico comisado foi depositado de xeito provisional en dependencias da Garda Civil de Pontevedra e o seu propietario corre o risco de ser sancionado con multa de 300 a 30.000 euros, conforme á lexislación vixente.