O Concello de Caldas de Reis vai dar a coñecer o proxecto técnico orixinal e inédito de urbanización da Praza Martín de Herrera, coñecida popularmente como Plazuela, redactado en 1896 polo recoñecido arquitecto Jenaro de la Fuente e executado nese mismo ano, xustamente hai 125 anos. O documento foi identificado hai uns meses polo departamento de Cultura no Arquivo Histórico Municipal.
Por este motivo o Concello avanza que proximamente tamén se vai proceder á restauración integral deste conxunto histórico singular e da súa contorna perimetral para recuperalo e poñelo en valor. Xa está realizado o levantamento topográfico da zona e encargarase a redacción do proxecto técnico de restauración que comprenderá a restitución do valado perimetral en forxa e das estruturas ou machóns que o modulan en granito, así como das escaleiras e da iluminación na súa posición e candieiros orixinais.
A Plazuela é un espazo histórico moi significativo para a historia de Caldas e os caldenses. Atópase situada parcialmente no lugar que ocupaba a primitiva igrexa de Santo Tomás Becket, que foi demolida para construír a actual, pero xa no século XIX ese espazo chamábase Plazuela de la Iglesia. Ademáis, está moi preto da Fonte da Burga, tamén obra doutro insigne arquitecto decimonónico, Alejandro Rodríguez Sesmero.
Paralelamente o Concello vai traballar en estudar a fondo o proxecto orixinal da Plazuela e en identificar outras posible obras de Jenaro de la Fuente na Vila Termal. Amais da Plazuela tamén son obra súa o edificio do Balneario Acuña, que conforma a imaxe máis recoñecida e icónica de Caldas de Reis, a casa de Laureano Salgado, empresario caldense coñecido como o Rei dos saltos de auga pola súa contribución ao desenvolvemento dos aproveitamentos hidroeléctricos en Galicia, e a residencia privada Villa Augusta. Así mesmo, De la Fuente desenvolveu por encargo do Concello a reforma do plano da poboación nesa zona central que definiu a súa morfoloxía urbana tal e como a vemos hoxe en día, dando unha visión urbana ampla e moderna do centro da vila.
Con estes motivos o Concello tamén está a traballar na posta en marcha dunha ruta do patrimonio histórico e arquitectónico a través da que dar a coñecer e poñer en valor tanto a obra de Jenaro de la Fuente como a totalidade da riqueza arquitectónica e histórica da vila de Caldas.
O alcalde, Juan Manuel Rey, mostrouse orgulloso "por redescubrir unha nova obra de Jenaro de la Fuente na nosa vila" e fixo fincapé no compromiso municipal por "restaurar e protexer este patrimonio e poñer en valor este espazo urbano tan significativo, así como todo o centro histórico da vila a través da ARI e outros instrumentos urbanísticos".
Pola súa parte, o concelleiro de Obras e Infraestruturas, Manuel González, sinalou que "o Concello xa avanzou coa contratación do levantamento topográfico e contratará coa maior celeridade a redacción do proxecto técnico para poder executar a obra tan pronto como teñamos dispoñibilidade orzamentaria".
Jenaro de la Fuente Domínguez naceu en Valladolid en 1851 e trasladouse a Vigo en 1874 onde exerceu como arquitecto municipal durante moitos anos. Na súa destacada traxectoria deixou unha forte pegada na cidade olívica onde é artífice do ensanche vigués e pai de máis de 80 edificios da cidade. Tamén son proxectos seus o gran hotel do Balneario de Mondariz, o Pazo de Lourizán, ou a Casa do Concello de Gondomar, entre outros.
