Música, etnografía e gastronomía son os tres compoñentes do programa da terceira edición de A Revolta do Umia, un evento festivo e aberto á partición de todos os públicos, que se celebrará o día 31 en Cuntis. Como sucedeu nos dous anos anteriores, o escenario será Vilar do Mato e, quen o desexen, disporán de transporte colectivo para realizar o desprazamento e zona de acampada.
Aqueles que queiran coñecer a contorna e abrir o apetito poden participar nun paseo que comezará ás 11.30 horas por unha contorna no que a presenza dun conxunto de muíños, situados nas proximidades do río, é a súa característica diferenciadora, así como a abundante e variada flora fluvial.
O grupo local Hai que Roelo será o encargado da alborada e ás 13.00 horas, o actor Antonio Durán, Morris, lerá o pregón inaugural da festa, que terá continuidade coa sesión vermú e a comida popular. Haberá food truck's, pero os que aposten por un menú enxebre (composto por polbo e churrasco, con sobremesa e café), terán que realizar a reserva chamando aos teléfonos 660 178 919 e 646 138 434. O prezo é 22 e o infantil é de 12.
Tocarán grupos como Oh! Ayatollah, The Lelli Kelly's ou a regueifeira Alba María
A quenda das regueifeiras Alba María e Lupe Branco será ás 16.00 horas, e durante a tarde haberá unha serie de actividades destinadas aos nenos. Se se cumpren os horarios establecidos polos organizadores, o festival comezará ás 18.30 horas, e son seis os grupos que figuran no programa: Wach Mckánijan e Os Outsiders, Os Residuos Atractivos, The Lelli Kelly's, Os Jhon Deeres, Plan Siberia e Oh! Ayatollah. O Concello de Cuntis colabora na organización.
