Que o rural é unha contorna que ofrece numerosos atractivos é unha mensaxe que se repite unha e outra vez, e que aqueles que dispoñen dunha vivenda no mesmo (e mellor cun terreo anexo) están en mellor situación para afrontar o impacto da covid-19 que os que viven en edificios, tamén.
O que non ten tan claro o concelleiro de Urbanismo da Estrada é que sexa este o motivo do repunte de solicitudes de construción no rural, pero o que de verdade lle importa, e resalta, é que desde o pasado verán sexan trece as peticións de licenzas de construción que entraron no seu departamento.
Son sete as parroquias onde se atopan os solares elixidos para levantar as vivendas, con Guimarei á cabeza, con tres. Na relación tamén figuran Toedo, Berres, Sabucedo, Couso, Ouzande e Callobre.
A distribución é outro factor sobre o que chama a atención Louzao e considera significativo das variadas posibilidades e enclaves paisaxísticos que ofrece un dos municipios con maior extensión de España.
Outro apuntamento interesante estriba no perfil daqueles que decidiron apostar polo rural estradense. Non son nin novos nin xubilados, senón que se trata de familias de mediana idade que teñen unha situación estable e un futuro perfilado. A maior parte son veciños que retornan ao lugar no que naceron, aínda que tamén os hai que estrean domicilio.
Subliña Louzao que a maior parte están activos laboralmente e as súas posibilidades de traballar desde os seus domicilios contan co respaldo decisivo que supón o despregamento da rede de fibra óptica que se está levando a cabo en todo o territorio.
Dispor dun sistema sanitario que dé resposta ás necesidades que poidan exporse, do mesmo xeito que nos apartados da educación, as infraestruturas viarias e as actividades sociais, deportivas e culturais son outros puntais nos que se basea esta tendencia, agrega o edil.
O Departamento de Urbanismo está a realizar a tramitación que lle corresponde e trata de ser resolutivo, pero os prazos non só dependen do Concello, senón dos informes que poden necesitar e cuxa expedición depende de determinados organismo da Xunta, puntualiza Louzao.
