O alcalde de Lalín, José Crespo, e a presidenta da Deputación, Carmela Silva, pecharon o pasado mércores os primeiros acordos para a posta en marcha de novos proxectos na localidade, tras a renovación de ambos os gobernos. Un deles será o impulso dun novo plan para potenciar o Viveiro de Empresas, coa posta en marcha de iniciativas conxuntas.
O servizo, situado no polígono Lalín 2000, debe ser relanzado para tratar de incrementar a súa actividade a participación de emprendedores e empresarios nel. Por outra banda, Silva trasladou ao concelleiro a disposición do Goberno provincial para o traspaso ao Concello da xestión do Centro Castrodeza, unha vez que remate a actual concesión, o próximo ano.
A presidenta e o alcalde tamén pecharon o calendario para avanzar en iniciativas conxuntas para potenciar o apartado de investigación do laboratorio do Centro de Xestión de Coñecemento Arqueolóxico así como o espazo museístico do Pazo de Liñares.
As necesidades do sector agrogandeiro foron outro dos aspectos tratados na reunión. Neste sentido, acordaron un calendario para mellorar a capacidade e rendemento da Finca de Mouriscade e concertar encontros cos gandeiros para esixir á Xunta de forma conxunta que faga fronte ás dificultades en temas como a xestión dos xurros. Crespo e Silva tamén acordaron mellorar a seguridade viaria e peonil na estrada EP-6005 Prado-Bodaño.