Nunha das súas visitas a España, durante unha comida en Ourense, o que foi campión mundial de xadrez, o ruso Anatoli Kárpov, preguntou que comían os galegos como guarnición antes da chegada das patacas. Castañas, dixéronlle. E entón el, procedente dun país onde este froito é moi apreciado, admitiu que lle parecía moito mellor acompañamento que o tubérculo. Esta anécdota contouna onte o deputado provincial de Turismo, Santos Héctor, na presentación do libro "No medievo, castañas e castiñeiros como recursos económicos", escrito por Héitor Picallo e deseñado polo seu irmán Martiño Picallo.
O acto formou parte da xornada dedicada á castaña que se celebrou en Cuntis, municipio que desde hai catro anos está a apostar por este cultivo. O seu alcalde, Manuel Campos, aproveitou para anunciar que o Concello levará a cabo un proxecto co Concello zamorano de Lubián "para o fomento do cultivo da castaña, a promoción de soutos e o procesado" deste froito. A iniciativa forma parte do programa Empleaverde, concedido pola Fundación Biodeiversidad e financiado polo Ministerio de Transición Ecolóxica. En base a el, un mínimo de 20 veciños de cada localidade, preferiblemente desempregados, formaranse neste sector, visitarán plantacións e coñecerán experiencias tanto en Galicia como noutros puntos da xeografía española e Portugal. O próximo día 22 o rexedor cuntiense desprazarase a Madrid para iniciar o programa. Así mesmo, en decembro celebrarase no municipio unha xornada técnica sobre a plantación de castiñeiros.
En 2017 púxose en marcha en Cuntis o primeiro cultivo experimental da provincia. Plantouse unha hectárea da variedade Longal, avalada pola Indicación Xeográfica Protexida (IXP) Castaña de Galicia. "Están xurdindo plantacións novas e moita xente está a preguntar como facer", asegura o rexedor.
O presidente da IXP, Jesús Quintá, apuntou este sábado que Galicia é a primeira potencia de España na produción de castaña, que exporta a 27 países. Recordou que tras a guerra foi fundamental como sustento para as familias, e que, en plena crise, volve selo como complemento ás súas economías. Héitor Picallo conta no seu libro que as plantacións de castiñeiro formaron parte dos privilexios reais e servían como dotes de vodas e que as castañas se utilizaron para pagar misas.
