Como sucedeu hai unha semana, e á mesma hora que entón, varios centenares de veciños de Cuntis concentráronse de novo este venres fronte á fachada principal do Centro de Saúde da localidade para deixar patente a súa demanda ante a Consellería de Sanidade de que repoña o servizo de pediatría, e denunciar outras carencias na atención sanitaria.
Como na mobilización anterior, asistiron os representantes dos tres grupos políticos representados na Corporación municipal (PSOE, PP e Veciñanza) para reclamar "que, dunha vez por todas, teña en conta as reivindicacións ante a situación insostible coa que a poboación se atopa cada día", subliña o Concello.
Nunha breve intervención, o alcalde de Cuntis, Manuel Campos, informou aos asistentes de que non recibira resposta algunha por parte das autoridades sanitarias, e ratificou que as concentracións se repetirán todos os venres ata que o Sergas atenda a demanda.
O rexedor agradeceu a presenza veciñal e dos representantes de todos os grupos e adiantou que en breve manterán unha reunión coa finalidade de abordar a posibilidade de intensificar a presión sobre a Xunta de Galicia, para o que barallan a alternativa de convocar unha manifestación. "A loita continúa", dixo para pechar a súa alocución entre aplausos.
Idénticos argumentos son os que manexan os representantes dos grupos municipais do BNG e o PSOE no Concello