As carencias na atención sanitaria que presta o Sergas nos municipios da comarca Ulla-Umia segue provocando protestas por parte de usuarios e institucións. É o que sucede en Cuntis, Caldas de Reis e Catoira, concellos nos que as denuncias parten tanto de veciños como dos concellos, e súmanse á realizada polo BNG de Moraña.
Desde hai unha década, Jesús Reboredo Velay sofre insomnio crónico, segue un tratamento diario no que figura a inxestión de dez pastillas, e relata que o 24 de setembro solicitou cita no Centro de Saúde de Cuntis, que lle deron para o 6 de outubro, día no que lle cambiaron a medicación que tiña pautada. O 8 empezou coa nova, que se prolongou ata o 13, data na que lle indicaron que regresase.
Reboredo agrega que cando solicitou a nova cita, indicáronlle que non podía ser atendido e recomendáronlle acudir sen ela e que falase co médico, que non quixo atendelo, polo que a pediu o 14, e déronlla para o 28, e con outro profesional.
Tanto o día 8 como o 16, este veciño de Cuntis deixou constancia do sucedido por medio de sendas reclamacións que realizou no Centro de Saúde. Meses atrás, foi chamado para ser atendido ás 9.00 e o médico non chegou ata a 11.00. Noutra ocasión figuraba ás 13.30 a cita, e dixéronlle que fose a Caldas de Reis.
Desta incidencia tamén quedou constancia nunha acta redactada por un axente da Policía Local. Este extremo foi corroborado polo alcalde, Manuel Campos. O rexedor lamentou que o Sergas siga sen resolver un problema que se prolonga no tempo.
"Que tomen as medidas que sexan necesarias para que vos veciños teñan unha sanidade decente e non teñan que estar arratrándose como está a pasar", reclama Jesús Reboredo no seu escrito. "É unha puta vergoña", lamenta.
A fachada de Centro de Saúde foi o escenario de varias concentracións por este motivo, e o Concello trasladou o seu malestar, e as demandas veciñais, á Consellería de Sanidade, pero a situación non mellora, polo que Jesús Reboredo expón que "hai moitas máis medidas de presión que as que se están a tomar".
Esta situación obrigou ao persoal que se ocupa do apartado administrativo a desconvocar todas as citas que estaban concedidas pola mañá e pasalas á tarde, coa consecuente perda de tempo e os trastornos que posiblemente cause a quen tiveron que cambiar a súa programación. Para a semana próxima semana cambian a situación: haberá médico pola mañá, de 9.00 a 13.00 horas, pero non nas xornadas de tarde.
Xestiones
Ante esta situación, o Goberno local de Catoira realizou diversas xestións ante a xerencia da EOXI para reclamar que adopte as medidas precisas coa finalidade de pór fin a este perentorio problema.
O alcalde, Xoán Castaño, mantivo, no pasado mes de agosto, unha reunión co director da o EOXI. Naquel encontro, o rexedor denunciou os recortes en persoal durante o verán, e a resposta que obtivo foi que a situación se normalizaría ao finalizar o período de vacacións, e así o anunciou nun comunicado. Con todo, os problemas continúan.
Carencias en pediatría
En Caldas de Reis, o Goberno local denuncia a situación de "precariedade" do Servizo de Pediatría. A pediatra está a atender nun local municipal, recorda, engade que é unha mostra do "pasotismo da Xunta coa sanidade" e mantén que este municipio debería contar con dous profesionais, pero só hai un e incluso, nalgúns días, non dispón de ningún. O problema agrávase tendo en conta que debe facerse cargo da demanda de varios concellos lindeiros, preza o Goberno local. De "flagrante", califica a "deixadez" que atribúe á Consellería de Sanidade, e considera "imperdoable" que "mintan". Outro exemplo produciuse o día 12, cando se produciu un accidente grave no lugar de Paradivas. O médico tivo que desprazarse ata este lugar, e cando regresou á súa consulta, 43 persoas estaba ao esperar para que as atendese. Unha vez máis, o Concello pide que se reforce o persoal.