A próxima semana desenvolverase a visita a Caldas de Reis dunha ampla delegación colombiana do Departamento de Calfas e do Departamento de Risaralda, para impulsar acordos de colaboración en materia cultural, educativa e económica entre Galicia e o Eixo Cafetero de Colombia.
Esta cita celebrarase con motivo da conmemoración do 250 aniversario do nacemento do ilustre científico Francisco José de Caldas, descendente de Caldas, e que lle deu nome a toda unha rexión, o Departamento de Caldas, con capital en Manizales.
Para apoiar os actos conmemorativos e ampliar os lazos de irmandade entre estes dous lugares, desprazaranse a Caldas de Reis o Presidente da Asemblea Parlamentaria desta delegación de Risalda, o Secretario de Facenda do Goberno de Caldas, o alcalde do municipio de Mariquita, os representantes do Concello de Manizales, o presidente da Federación das ONGS de Caldas e o Xerente da empresa 'Industria Licorera de Caldas', entre outros.
O Departamento de Caldas, con preto dun millón de habitantes, é un territorio estratéxico en Colombia, cuxo desenvolvemento está focalizado na industria do metal, a tecnolóxica e a produción agrícola.
Conscientes da importancia das relacións co país colombiano, Caldas de Reis organizou unha ampla axenda de traballo durante os días 12, 13 e 14 de setembro. Así, a delegación de Colombia será recibida no Parlamento de Galicia, a Xunta de Galicia, a Deputación de Pontevedra, a Universidade de Vigo, a Cámara de Comercio de Vigo, Pontevedra e Vilagarcía, o Consorcio da Zona Franca de Vigo, entre outros encontros con axentes institucionais, sociais e económicos da comunidade.
Os traballos iniciaranse cunha primeira recepción no Salón de Plemos do Concello de Caldas, o vindeiro mércores ás 9.30 horas, na que participarán os membros da corporación municipal e representantes das empresas vinculadas ao municipio.
O obxectivo dos encontros é fortalecer a internacionalización e o intercambio comercial entre empresas de ambos os terriotorios.