Varadoiro é o nome dun bar situado a beiras do río Bermaña, en Caldas de Reis, que recibiu a visita dos ladróns e cuxo nomee foi usado pola Garda Civil para denominar un laborioso operativo que culminou en Vigo coa detención de cinco persoas como presuntas autoras de 31 roubos cometidos en cafeterías, bares e establecementos de hostalería da provincia de Pontevedra, ás que tamén lles atribúen varios na Coruña, Salamanca e Zamora.
Os cinco son de Vigo, tres homes e dúas mulleres de idades comprendidas entre 33 e 45 anos, do mesmo xeito que unha sexta persoa que está a ser investigada. Romper as máquinas e roubar o diñeiro era o seu plan de acción, e así lograron apoderarse dun botín duns 60.000 euros.
As máquinas comecartos eran o seu obxectivo e lograron un botín de 60.000 euros, ademais de causar danos por valor de 48.000
Era un grupo criminal estruturado cun amplo historial de antecedentes que actuaba de forma coordinada e co rostro cuberto, en grupos de dous e tres, para o que usaban unha ampla variedade de vehículos.
A Garda Civil de Vilagarcía puxo en marcha as investigacións a principios deste ano, por mor dun roubo cometido no bar situado en Caldas de Reis.
Os axentes dos cuarteis de Baiona, O Porriño e Ponteareas tamén participaron na tarefa de coordinar e levar a cabo un dispositivo conxunto que permitiu esclarecer 31 delitos.
Deste xeito, a Garda Civil puido chegar a identificar e ir detendo aos presuntos autores desde principios do mes de outubro. Dos 31 roubos perpetrados en locais de hostalería, 26 tiveron lugar na provincia de Pontevedra: cinco en Nigrán, tres en Baiona, Ponteareas e Vilagarcía, dúas no Porriño, Gondomar, Tui, Caldas de Reis e Cambados, un na Cañiza e outro en Pontevedra.
O radio de acción deste grupo estendeuse á provincia da Coruña, cun roubo en Padrón, e fóra de Galicia, ao perpetrar dous Salamanca e outros dous na localidade zamorana de Tábara.
En todos os casos investigados, a Garda Civil destaca a especial contundencia que empregaban os compoñentes do grupo para esnaquizar as máquinas recreativas, cuxa recadación era o seu principal obxectivo, chegando a causar danos materiais que superan os 48.000 euros, que sumados aos 60.000 do botín logrado nos 31 roubos con forza sitúan a cifra total en 108.000 euros.
As dilixencias instruídas, nas que figuran os detalles deste caso, foron entregadas no Xulgado de Instrución número 1 de Caldas de Reis, que decretou a liberdade provisional con cargos de todos os detidos.
