Dous homes de 67 e 40 anos foron detidos pola Garda Civil tras ser sorprendidos nun control de estrada en Caldas de Reis en posesión de 2,2 quilos de cocaína.
Os dous detidos viaxaban nun turismo que foi interceptado, sobre as nove da noite do pasado martes, no control que o instituto armado realizaba na autoestrada AP-9.
A ambos se lles acusa dun presunto delito contra saúde pública, na súa modalidade de tráfico de drogas.
Ao rexistrar o coche, os axentes localizaron no seu interior dous paquetes con envoltorios plásticos, nos que ía a droga intervida.
Por mor destas detencións, efectivos do equipo de delincuencia organizada e antidroga da Garda Civil realizaron senllos rexistros nos domicilios dos dous homes, nos que estiveron acompañados de cans do servizo cinolóxico.
A Garda Civil confirma que estes dous homes, ambos os naturais de Vilagarcía de Arousa, contan cun amplo historial de antecedentes policiais.
O xulgado de instrución número 1 de Caldas de Reis decretou o ingreso en prisión comunicada e sen fianza dun dos dous homes. O outro detido, segundo desvelou o Tribunal Superior de Xustiza de Galicia, quedou en liberdade provisional.
