Desmantelada unha rede de tráfico de drogas dirixida desde Catoira

Sete persoas resultaron detidas nunha operación na que se incautaron un total de 20.000 "doses de sustancias estupefacientes"

Parte del material incautado. GUARDIA CIVL
photo_camera Parte do material incautado. GARDA CIVL

Sete persoas foron detidas no marco dunha operación contra o tráfico de drogas relacionada coa venda de sustancias estupefacientes polo miúdo en diferentes localidades galegas situadas nas provincias de Ourense, A Coruña e Pontevedra, como Ribadavia, Milladoiro, Brión, Catoira, Boiro e Cambados.

Segundo informou a Comandancia de Ourense, axentes da Unidade Orgánica de Policía Xudicial da Comandancia da Garda Civil de Ourense incautáronse dun total de 20.000 "doses de sustancias estupefacientes" na denominada operación Nanverril, que se iniciou a primeiros de maio, cando a Garda Civil tivo coñecemento da existencia dun punto de venda de cocaína, en Ribadavia, que suscitara a alarma social.

A partir de aí, descubriuse unha "rede estable" na localidade de Catoira que se encargaba de fornecer" a outras persoas para a súa posterior venda polo miúdo.

Esta rede tiña conexións, segundo estas mesmas fontes, coas localidades de Boiro, "Brión, Milladoiro e Carballo; Catoira, Cambados e A Guarda e as localidades do Carballiño e Ribadavia, na provincia de Ourense, e incluso con persoas de Barcelona".

A investigación foi levada a cabo polo xulgado de primeira instancia e instrución de Ribadavia xunto co fiscal antidroga da fiscalía provincial de Ourense, en colaboración coa Comandancia da Garda Civil da Coruña e Pontevedra.

Os sete detidos teñen nacionalidade española e contan con idades comprendidas entre os 35 e 54 anos.

Entre as sustancias aprehendidas, había heroína, cocaína, anfetamina, marihuana e haxix, cun valor aproximado no mercado de 200.000 "euros", sinala o Instituto Armado.

Ademais, a Garda Civil achou nos rexistros domiciliarios varios teléfonos móbiles, dous vehículos, diñeiro en efectivo e útiles e sustancias destinadas ao corte, preparación, elaboración e distribución de drogas. 

Comentarios