As diferenzas co criterio do Goberno local, presidido por, Ricardo Martínez, en canto á súa xestión á fronte da Concellería de Cultura, é o argumento ao que apela quen foi a titular deste departamento durante os últimos cinco anos, Maribel Novo, para xustificar a súa determinación de presentar a súa renuncia á acta de concelleira na Corporación municipal de Portas.
"En principio é unha ruptura co Concello", dixo a ex edil, antes de expor que foron varios os motivos que a empuxaron a adoptar unha decisión que afirmou meditar con calma, e non "dun día para outro".
Novo afirma que a súa retirada da vida política local non está vinculada á súa exclusión da candidatura ás eleccións autonómicas
O rexedor, pola súa banda, asegurou que non foi a consecuencia de controversia política algunha e achacou o sucedido a motivos "persoais, empresariais e familiares". Martínez mantivo que "non foi por ningunha outra cousa". "Ten que dedicarse a outras cousas e deixouno", reiterou o alcalde, que anunciou o nome da persoa que a substituirá na Corporación municipal, Ana María Pena, a seguinte na candidatura presentada en maio do ano 2019, ademais de adiantar que o pleno se celebrará no mes de xullo.
RENUNCIA. Maribel Novo sinalou que presentou a súa renuncia a semana pasada e o Pleno foi informado deste paso nunha sesión celebrada o día 15 coa finalidade de proceder ao sorteo para elixir aos membros das mesas electorais nas eleccións autonómicas.
A exconcelleira non quixo entrar nos motivos concretos que deron lugar ao seu abandono ("non quero afondar", respondeu) e engadiu que a súa renuncia non equivalerá a desentenderse da vida cultural do municipio, e menos cando os colectivos que a levan a cabo, especialmente a Banda de Música Unión de Lantaño, están a pasar uns momentos moi delicados por mor da irrupción do coronavirus, que provocou clausúraa das súas actuacións. "Agora hai que axudalos máis que nunca", subliñou, e mantivo que como unha veciña máis do municipio pode seguir facéndoo.
A súa retirada tampouco ten relación algunha coa circunstancia de que non vaia renovar a súa acta de deputada do PP no parlamento ao non figurar na candidatura.
"Quero deixar claro que non é por iso", recalcou antes de advertir de que nunca se expuxo a política como unha profesión e dixo estar a desexar retomar a súa vida familiar e profesional.
