O proceso concursal no que se atopa inmerso desde febreiro o colexio Sagrado Corazón do Deza encara a súa recta final. O despacho vigués de avogados Lener, que leva a administración concursal, xa remitiu ao Xulgado do Mecantil número 2 o seu informe sobre a situación económica do centro de Lalín, que acumula unha débeda de 2,1 millóns de euros.
Agora, o maxistrado atópase ante unha dobre posibilidade que deberá resolver nas próximas semanas: asinar un convenio entre as partes (que non parece viable) ou unha liquidación que pasa pola venda total das instalacións, opción que aconsellan os propios administradores concursais, posto que suporía unha solución definitiva ao futuro do colexio.
Aí entran en xogo as dúas noivas que se lle presentaron ao Sagrado Corazón do Deza. Por unha banda, a oferta que encabeza Venancio Salcines, socio do Centro de Estudos Superiores Universitarios de Galicia (Cesuga), que conta cunha ampla experiencia no sector da docencia de máis de 25 anos. A súa alianza con empresas galegas permitiulle ampliar a súa oferta a convenios, prácticas de alumnos e inserción laboral, ofrecendo "un proxecto ambicioso que permitirá asumir novos retos, abrir novas vías de colaboración e ampliar a oferta formativa", segundo explica a entidade.
Os administradores concursais recollen no seu informe económico que a débeda do centro ascende a 2,1 millóns de euros
O obxectivo é ampliar a súa oferta de graos, másteres e doutoramentos implicada na "excelencia formativa e nos aspectos sociais e de compromiso coa comunidade".
O propio Salcines solicitou unha reunión para este xoves co comité de empresa do centro para expoñerlle o seu proxecto.
A segunda aspirante a adquirir o colexio lalinense é Scientia School. Na súa web defínese como operador de centros de ensino "co expertise (pericia) na recuperación de colexios distress (en dificultades económicas), que non contan con recursos humanos e económicos suficientes, preservando os seus valores, ideario e proxecto educativo".
Con todo, esta opción provocou o receo da comunidade educativa, debido a que se relacionou a empresa matriz, o grupo investidor Atlas Holdings, con fracasos financeiros (caso Hedonai) ou máis recentemente un escándalo moi mediático en México vinculado a unha franquía de centros de beleza chamados Neoskin, que fundou o administrador de Atlas.
