A terceira edición da feira da enerxía de Galicia, Enerxétika, celebrarase entre os días 3 e 5 de febreiro de 2022. Así o decidiu este venres o seu comité organizador nunha reunión por videoconferencia na que participaron representantes dunha trintena de empresas; a xerente do Instituto Enerxético de Galicia, Vanessa Cal, e o director de Enerxía, Juan Ignacio Rodríguez.
O certame, aprazado en 2020 debido á crise sanitaria xerada pola covid-19, estaba previsto do 4 ao 6 de novembro, pero os seus promotores, logo de analizar a situación, determinou a idoneidade do adiamento.
Por unha banda, valorou a configuración do calendario feiral no ámbito enerxético, pois os movementos de data doutros eventos debido á pandemia supuxeron a concentración de citas relevantes en datas moi próximas a Enerxétika. Isto podería comprometer a presenza de expositores e visitantes comúns, que xa transmitiran á organización a súa preocupación neste sentido, e condicionar deste xeito o seu crecemento positivo.
Por outra banda, avaliou a incerteza que segue existindo entre algunhas empresas, especialmente de gran tamaño e presenza internacional, que lles levou a adoptar políticas restritivas que limitan a presenza en feiras ou ben non contemplan a súa participación en ningún evento este ano.
Así mesmo, tivo en conta que este atraso suporía mellorar a confianza do público e tamén que o valor engadido que supón a celebración do Xacobeo manteríase pola súa extensión a 2022.
Con todo iso, apostou por recuperar as súas datas habituais nos primeiros meses dos anos pares, o que tamén supón consolidar o certame no calendario.
Pretende así asegurar o nivel de resultados da feira e continuar coa súa evolución. Na edición de 2018 acudiron de 104 expositores directos e 5.479 metros cadrados de superficie ocupada.
