Os máis de 30 produtores estradenses puxéronse ao choio e desempoaron a maquinaria para recoller as deliciosas mazás que crecen nas árbores nunha superficie de máis de 100 hectáreas.
Xa comezou a colleita deste delicioso froito nun dos concellos de Galicia con maior produción, e o prognóstico é moi bo. O técnico da cooperativa Ullama, Miguel Soto augura unha recolección total de arredor de 1.200.000 quilos de mazás.
"Este é un bo ano", dixo, a pesar de que "a primavera foi horrible. Cando o froito empezou a asomar chovía e fixo frío", apuntou Soto, pero é optimista e espera que durante este mes o tempo acompañe para que de tempo a realizar toda a colleita antes de que empecen as choivas.
Os produtores máis madrugadores iniciaron a recollida nos seus terreos a finais do mes de setembro, e o resto puxéronse ao choio xa a semana pasada. Así, a finais de outubro espérase que a campaña deste ano estea finalizada.
Debido á vecería –alternancia de anos de boas colleitas seguidos doutras malas– este ano a colleita prevese moi superior á do 2020, cando os produtores do municipio estradense chegaron a colleitar apenas a metade do prognosticado este ano, medio millón de quilos de mazás.
INNOVACIÓN. Como moitos outros sectores, o campo tamén se moderniza, e cada ano os produtores adquiren nova maquinaria para facilitar o traballo. A cooperativa Ullama conta xa desde hai uns anos con maquinaria para varear as árbores, sobre todo os exemplares máis novos.
"O de facelo á man practicamente desaparece", apunta o seu técnico, quen explica que seguindo este método mecanizado a árbore "non se golpea tanto, non sofre" e, xa que logo, mellóranse as condicións de cultivo.
Por outra banda, Miguel Soto asegura que, polo momento, non hai noticia algunha sobre o polígono agrario que o ano pasado anunciaba a Xunta para potenciar a produción da mazá no municipio. Con todo, espera que estes novos terreos sexan pronto unha realidade para así impulsar o sector no municipio.
A maior parte do froito colleitado véndese á firma Custom Drinks, que elabora a marcha de sidra galega Maeloc. Outra porcentaxe, aínda que moito máis pequeno, da colleita, destínase a sidrerías asturianas; mentres outro se utiliza para a produción de sidra local que cada vez vai gañando máis adeptos. As marcas de sidra con ADN estradense a día de hoxe son Ribela, Peroja, López Pampín, Camiño, Sidra de Vexa e Torres de Moreda.
