Un neno de cinco anos foi trasladado en ambulancia na tarde do martes ao Hospital Provincial de Pontevedra tras ser atropelado na estrada N-640 ao seu paso pola parroquia de Troáns, pertencente ao Concello de Cuntis. O accidente ocorreu sobre a hora para comer, cando o escolar regresaba a casa tras cumprir a súa xornada educativa no colexio.
Ao parecer, o neno soltouse da man da súa avoa, que o foi a recoller ao autobús que o trasladaba desde o colexio xunto ao seu irmán, e cruzou a estrada correndo. Os vehículos que pasaban intentaron evitalo, pero un deles impactou co menor.
Aínda que nunca perdeu o coñecemento e as lesións non parecían graves (só unha ferida na fronte), os servizos de urxencia de Cuntis e unha enfermeira que o atendeu no lugar do accidente decidiron que fose trasladado a Pontevedra para ser recoñecido máis a fondo polos profesionais do Hospital Provincial.
