O delegado do Goberno, Javier Losada, confirmou que, por mor dunha denuncia presentada polo portavoz socialista no municipio pontevedrés de Lalín, o Ministerio de Fomento "púxose en marcha", a través da Demarcación de Estradas de Galicia, e comprobou que, efectivamente estábase producindo "un cobro indebido" aos usuarios da AP-53, no tramo entre Lalín e Silleda.
"Mandouse aos inspectores", dixo Losada en rolda de prensa, e eles comprobaron que se estaba cobrando "indebidamente" aos usuarios da vía, de modo que se puxo en marcha un expediente, para aclarar os motivos que propiciaron esta circunstancia, pero ademais ordenouse a devolución inmediata do diñeiro que os condutores tiveron que abonar de máis na peaxe dese tramo de autovía.
Ademais, precisou Losada, tamén se lle ordenou á concesionaria que "arranxase o problema" para que os usuarios non sigan pagando de máis polo uso dese tramo da AP-53.
Uns adhesivos informan desde este mércores das tarifas vixentes desde o 1 de xaneiro
Neste sentido, desde o Ministerio de Fomento informaron de que a empresa concesionaria xa realizou os axustes técnicos nos sistemas de identificación de matrículas para que calquera fallo ocasional que poida producirse no futuro na AP-53 o sexa, en todo caso, en contra da sociedade concesionaria e non do usuario.
Con todo, como medida informativa para o consumidor, dispuxéronse na mañá deste mércores adhesivos informativos das tarifas vixentes desde o 1 de xaneiro.
A empresa concesionaria vinculou a problemática a un fallo técnico nalgunha das cámaras de recoñecemento de matrículas nun dos traxectos. En concreto, a lectura incorrecta provocaba o cálculo erróneo do percorrido realizado polos vehículos.
