O Goberno local de Forcarei iniciou o xoves os contactos con distintas administracións, autonómica e provincial, co obxectivo de dotar ao municipio dun novo campo de fútbol.
A alcaldesa Verónica Pichel e o secretario da Escola de Fútbol Basee Terra de Montes, José Manuel Diz, reuníronse onte en Santiago co secretario xeral para ou Deporte, José Ramón Lete Lasa, co fin de presentarlle o proxecto e solicitarlle o apoio da Xunta de Galicia para poder levantar esta nova infraestrutura deportiva.
Verónica Pichel anunciou que en próximas datas tamén ten previsto expor este proxecto aos representantes da Deputación de Pontevedra, co mesmo obxectivo.
A rexedora aproveitou o encontro para entregar a Lete Lasa unha copia da memoria do anteproxecto construtivo da instalación deportiva. Un documento cuxa elaboración foi posible por medio da colaboración prestada ao Concello pola Federación Galega de Fútbol, logo da visita do seu presidente, Rafael Louzán, a Forcarei.
Pichel e Diz expuxeron a Lete Lasa que a obra é moi importante e responde a unha demanda social, porque na Escola de Fútbol Basee Terra de Montes participan máis dun centenar de deportistas.
A alcaldesa sinalou que o secretario xeral para o Deporte recoñece a prioridade desta actuación, polo que a convocou a unha nova reunión, que se celebrará no mes de xaneiro do ano 2020, unha vez que o organismo do que é responsable conte con novos orzamentos. Por outra banda, deixou aberta a porta á posibilidade de colaborar, parcialmente, na construción desta infraestrutura deportiva.
O Concello sinala que o anteproxecto é un documento moi ambicioso, e a súa alcaldesa comprometeuse a buscar os apoios que sexan necesarios para modernizar no posible o campo de fútbol de Forcarei.
