O Pleno do Concello de Forcarei aprobou este xoves manter en 12 euros o prezo público da 28ª Xuntanza de Maiores, que se celebrará o próximo 27 de setembro no Restaurante París. Ata agora, esta era a tarifa para os empadroados no municipio, pero por primeira vez, amplíase a emigrantes que acrediten unha residencia temporal na localidade.
A medida foi aprobada por unanimidade, aínda que o edil 'popular', Vicente Búa, criticou que o Concello estivese a cobrar as inscricións antes de aprobar o prezo. O concelleiro asegurou que houbo veciños que acudiron ao banco para abonar o seu reserva, "algo que nos parece arriscado" sen dar o visto e prace á tarifa.
A alcaldesa, Verónica Pichel, explicou que o Concello avisou de que día sería a 'xuntanza' e de que se estaba "á espera da aprobación do prezo" para poder inscribirse. Por outra banda, o Pleno aprobou os festivos locais para 2020. Serán o 31 de agosto, luns das Dores, e o 11 de novembro, coincidindo coa festividade do San Martiño.
REGULAMENTO NO AIRE
A proposta de aprobación do Regulamento Orgánico e de Funcionamento Municipal efectuada polo Goberno quedou sobre a mesa, tras solicitar BNG-Foro Forcarei que fose consensuada e tivésense en conta as súas achegas, expresadas no seu día. Para o PP, o regulamento "é innecesario".
O Pleno deu luz verde á Conta Xeral de 2018. O PP apoiouna, o BNG abstívose e o PSOE situouse en contra, aínda que finalmente a rexedora botou man do seu voto de calidade para sacala adiante, non entorpecer a tramitación e evitar que tivese que volver a Pleno por remitila ao Tribunal de Contas sen ser aprobada.
