A Garda Civil denunciou un veciño do municipio de Silleda pola desnutrición e falta de coidados que aparentemente padece unha egua da súa propiedade. As investigacións iniciáronse por mor dunha alerta cidadá e levaron efectivos do Seprona de Lalín ao lugar, onde constataron que o animal estaba "extremadamente delgado, con evidentes signos de desnutrición e cunha lixeira coxeira nunha das patas traseiras".
Atendendo ao relato do instituto armado, o propietario alegou que lle resultaba imposible prestar outros coidados á egua debido que estaba a atender un familiar enfermo.
O estado "aparentemente esfameado" no que se atopaba a egua e o feito de que carecese do preceptivo chip de identificación deu lugar a que o propietario fose denunciado administrativamente ante a Delegación Provincial da Consellería de Medio Rural. Atribúeselle unha infracción da normativa de sanidade animal pola que se establecen as normas de identificación e ordenación zoosanitaria dos equinos en Galicia.
