A Garda Civil puxo en marcha unha campaña informativa, dirixida pola Xefatura Provincial de Tráfico, orientada fundamentalmente aos vehículos agrícolas co fin de impulsar o seu "uso seguro".
Así o informou o Subsector de Tráfico da Garda Civil de Pontevedra nun comunicado, no que explicou que se distribuirán folletos con consellos sobre a distribución da carga, sinalización e o correcto uso dos dispositivos de seguridade persoal.
"Con ocasión das tarefas da vendima, propias destas datas, púxose en marcha esta campaña para garantir que os desprazamentos e traslados dos produtos ou materiais se realicen sen incidentes", indicaron as mesmas fontes.
Co fin de previr accidentes e modificar, no seu caso, os hábitos de comportamento para "crear condutas seguras", destacan, os compoñentes do Destacamento de Tráfico da Garda Civil de Lalín iniciaron a pasada semana a entrega dos folletos informativos na rede viaria das comarcas do Deza e Tabeirós-Terra de Montes.
Nos folletos recóllese información sobre as medidas de prevención "para evitar os volcos, que son os accidentes máis comúns", apunta a Benemérita, así como o "o adecuado mantemento dos vehículos e a obrigación de circular coas previdas autorizacións", tanto do condutor como do vehículo.
