Os dous fillos de Sandra e José Luís, que presenciarían os feitos, non sufriron ningún dano físico, segundo confirmou o coronel Venzal. Os pequenos permaneceron na casa dun veciño durante a mañá deste luns e, finalmente, por recomendación do equipo de psicólogos desprazado, serán custodiados pola irmá da avoa falecida.
"Enténdese, e eu véxoo correcto, que o domicilio do avó non é o máis acertado para que vaian, porque nel falta a avoa e a tía", explicou o rexedor da localidade.
O avó dos pequenos, pai e marido das falecidas, é empregado do Concello de Valga. Os psicólogos do Grupo de Intervención de Urxencias da Xunta acudiron ao lugar para porse a disposición tanto dos menores como do resto dos familiares. Tamén os servizos de acollida de menores da Administración autonómica ofrecéronse para facerse cargo dos dous nenos, aínda que a decisión final foi a de que estes fosen atendidos por familiares directos.
A Fundación Amigos de Galicia, que manifestou a súa repulsa contra os asasinatos, acudirase como acusación popular en defensa dos menores.
