Un home resultou ferido nun accidente ocorrido durante a madrugada deste mércores en Silleda.
Sobre as 4,40 horas, os servizos sanitarios informaron ao 112 Galicia dun coche accidentado con persoas atrapadas na N-525, fronte ao parque de Bombeiros.
Efectivamente, os Bombeiros do Deza confirmaron que procederan á excarceración do condutor do turismo. Ata o lugar tamén se desprazaron axentes de Tráfico tras ser informados os feitos polo 112 Galicia.
O ferido, unha vez liberado, foi atendido polo 061, que enviou unha ambulancia de soporte vital básico e un equipo sanitario da PAC de Silleda para atender ao home J.M.V.S., de 51 anos, que foi trasladado ao Hospital Clínico de Santiago.
CICLISTAS. Por outra banda, en Redondela un ciclista resultou ferido ao caer da bicicleta cando circulaba pola PO-250, á altura do punto quilométrico 4.
Foi o mesmo persoal sanitario quen, sobre as 20,00 horas deste martes, chamou ao 112 Galicia para comunicar que o helicóptero medicalizado con base en Ourense desprazábase ata o lugar, por mor da caída dun ciclista. Con estes datos, o 112 Galicia solicitou a colaboración de axentes de Tráfico e da Policía Local.
Ademais, sobre as 8,15 horas deste mércores un particular chamou ao 112 Galicia para solicitar asistencia sanitaria para un ciclista que acababa de ser atropelado na rotonda da Ponte Internacional, en Goián, na localidade pontevedresa de Tomiño.
Por iso, os xestores do 112 puxeron os feitos en coñecemento dos servizos sanitarios de urxencia e da Garda Civil de Tráfico. Tamén foron informados os Bombeiros do Porriño e o GES da Guarda e Protección Civil de Tomiño.
