A tenente de alcalde lalinense, María Paz Pérez, anunciou que a Plataforma de Contratos do Estado recolle dende o martes a licitación da primeira fase das obras do proxecto de Rehabilitación da Área Urbana de Donramiro, que contempla a rexeneración urbana do espazo xerado pola confluencia da rúa da Fonte e da rúa da Igrexa. Unha primeira licitación que ascende a 257.166 euros co IVE incluído, no que é "a primeira fase das actuacións de rehabilitación do núcleo de Donramiro" que se acometerá en sucesivas actuacións. As obras terán un prazo de execución de catro meses.
A área de actuación da primeira fase do proxecto "comprende o espazo urbano xerado pola confluencia da rúa da Fonte e Rúa da Igrexa, fronte ao acceso ao atrio da igrexa de Sta María de Donramiro", indica Paz Pérez.
O proxecto engloba tamén un tramo da rúa da Igrexa, o camiño que da acceso á casa reitoral e as embocaduras da rúa da Fonte no espazo urbano central. A praza xerada "reforza o seu carácter mediante a disposición do pavimento en plataforma única" mediante a disposición en franxas de perpiaños de granito silvestre de acabado abuxardado de 10x40 centímetros. Con este pavimento de pedra preténdese "por en valor o espazo, crear unha zona máis accesible ao cidadán e reducir a velocidade dos vehículos", apunta. Prevese a disposición de arboredo autóctono, carballo común, que permita controlar climáticamente devandito espazo.
En canto á rúa da Igrexa, prevese a execución dun pavimento en plataforma única, de coexistencia, pero diferenciando o uso peonil do rodado mediante a disposición do pavimento. O proxecto prevé a eliminación de solados tales que supoñan un exceso de pavimentación, en favor da creación de franxas verdes nos viarios. Tamén se disporá unha zona axardinada na zona este da rúa da Fonte, acondicionando a contorna da igrexa.
No camiño que dá acceso á reitoral do núcleo de Donramiro, as actuacións minimízanse dado o seu carácter tradicional. Preténdese conservar a súa imaxe e aproveitar a pedra existente, acondicionando o camiño mediante a disposición dun chan filtrante semiduro, de gran capacidade drenante e aparencia natural. A actuación contempla tamén a disposición dun espazo de aparcamento.
En canto ao tendido aéreo, considérase necesaria a total renovación da rede eléctrica existente, contemplando unha instalación de rede eléctrica soterrada na área de actuación. Tamén se recolle a renovación da iluminación pública mediante unha nova disposición de luminarias.
