Alumnado do instituto Laxeiro de Lalín asistiu na mañá deste venres, no vestíbulo do Consistorio, á apertura da exposición sobre científicas e tecnólogas que recibiron o Premio María Josefa Wonenburguer, un galardón impulsado pola Unidade de Muller e Ciencia co obxectivo de resaltar as traxectorias profesionais das mulleres que destacan en ambos os mundos.
A mostra foi inaugurada pola secretaria xeral de Igualdade, Susana López Abella, acompañada das edilas Begoña Branco e Paz Pérez. Consta de varios paneis, un por premiada, nos que se repasa o currículo das galardoadas desde a convocatoria do premio, en 2007, entre elas, a dezana Marisol Soengas. A distinguida este ano será a catedrática de Farmacia Mabel Louza.
