Cometer unha infracción que está catalogada como grave podería custar ao Concello de Valga unha multa de 300 euros. Se a sanción lle fose aplicada no seu grao máximo, en lugar do mínimo, a Administración local presidida por José María Bello Maneiro tería que desembolsar 30.000. Esta decisión foi proposta pola Consellería de Presidencia, logo de constatar que varios menores asistiron ao espectáculo de vaquillas que se celebra neste municipio.
O expediente foille aberto ao Concello por permitir a entrada de menores de doce anos na praza móbil que no pasado mes de xullo foi instalada en Vilarello, na que se celebrou unha solta de vaquillas, un espectáculo que se converteu nunha das atraccións da Festa da Xuventude.
Aínda que no recinto había carteis que informaban de que estaba prohibido, numerosos menores acompañaron aos seus pais e familiares nas bancadas, o que supón unha vulneración da Lei de Espectáculos Públicos de Galicia
A plataforma Galicia Mellor sen Touradas puxo os feitos en coñecemento da Consellería de Presidencia e sinala que esta circunstancia non foi puntual, nin que se tratou dun feito illado. O colectivo, que reclama a abolición deste tipo de espectáculos, considera que a proposta de sanción non é acorde ao grao de incumprimento da normativa. De aplicar o máximo rigor, tamén prohibiría a celebración de festexos taurinos en Valga durante un ano.
Algo máis de 13.000 firmas é o que Galicia Mellor sen Touradas e a asociación animalista Libera recolleron no ano 2017 para apoiar a súa petición de que sexa prohibida a capea.
