As obras de construción da rotonda na intersección das avenidas Estación, Montserrat, Xosé Cuíña e Madrid, en Lalín, retomaranse o vindeiro mércores, día 26, máis dun mes despois de que o Concello solicitase á Dirección Xeral de Patrimonio a pertinente autorización para o control arqueolóxico dos traballos e tras o cruzamento de reproches entre Goberno e oposición pola xestión dos permisos.
O reinicio das obras foi anunciado este luns polo alcalde, Rafael Cuíña, e o edil de Urbanismo, Nicolás González Casares, tras acordar coa firma adxudicataria que o momento máis conveniente para retomar os traballos sería unha vez concluídas as festas patronais das Dores, que se celebrarán entre os días 21 e 25.
Ambos os representantes municipais recordan que, de non ser pola "demora da Xunta" en dar o permiso, a rotonda podería estar xa practicamente concluída e lista para os festexos. Lamentan que o departamento da Consellería de Cultura "retardase" a execución "dunha obra de máxima importancia", pois servirá para mellorar a fluidez do tráfico e pretende pór coto aos continuos accidentes de tráfico que se rexistran neste cruzamento. A intervención suporá un investimento de 160.936 euros procedentes do superávit da conta municipal de 2016.
N-640. Por outra banda, González Casares supervisou o luns as melloras que o Servizo de Conservación de Estradas do Estado está a realizar no firme da glorieta próxima ao Centro Comercial Deza.
Este martes e o mércores haberá restricións de tráfico na zona debido a que os traballos continuarán na rúa Areal e na Nacional 640 ao seu paso por Cáceme (Goiás), a saída cara a Lugo.
