A asociación Ocionautas non parou as súas actividades durante o período do Nadal, máis ben intensificou as súas iniciativas e actividades ao considerar que este ano era máis necesario que nunca debido á situación sanitaria e as consecuencias derivadas tanto para a saúde como para a economía. "Debemos recordar aos nosos veciños que é fundamental manter o ánimo e sentirnos unidos ante a situación de incerteza que vivimos e aínda seguimos vivindo", comenta Alonso, un dos impulsores deste colectivo que serve de apoio para moitos mozos da Estrada, a súa comarca e Galicia en xeral.
"Cun espírito máis solidario e centrándonos na saúde e a motivación, deseñamos un programa 100% acción social e 0% festeiro", apunta Alonso. O primeiro paso foi acudir o 24 de decembro, día de Noiteboa, á residencia de maiores da localidade e entregar aos avós e avoas un arboliño do Nadal feito por xente da asociación, ademais de postais de agradecemento para os seus coidadores.
Na despedida do ano, o día 30 Ocionautas repartiu máscaras en estoxos deseñados cos grafitis de Murais da nosa lingua. O día 2, tras recibir o novo ano, tocou a quenda á recollida de lixo en espazos verdes e o embelecemento de muros con grafiti.
Precisamente esta actividade artística ha marcado parte da cultura estradense de finais de 2020. Ademais do labor beneficioso para os mozos participantes e lograr erradicar o feísmo dalgúns lugares do municipio, o proxecto Murais da nosa lingua que comparten Ocionautas e Concello da Estrada serve para render homenaxe a figuras como Marcial e Avelina Valladares, Manuel Varela Buxán, Manuel García Barros ou Virxinia Pereira, esposa de Castelao.
