Os portavoces dos tres grupos da oposición —Ana Pontón (BNG), Luís Villares (En Marea) e Xoaquín Fernández Leiceaga (PSdeG)— presentaron a petición conxunta para que se constitúa, na Cámara, unha comisión de investigación sobre os "recortes" en sanidade por mor da morte dunha persoa no Punto de Atención Continuada (PAC) da Estrada cando non había ningún médico e na que tamén propoñen indagar sobre a subministración de medicamentos para a Hepatite C.
A última reforma do regulamento do Parlamento permite á oposición constituír de forma automática unha comisión de investigación por lexislatura e, neste sentido, pediron ao PP que non "boicotee" o desenvolvemento deste órgano parlamentario coa súa maioría absoluta. Deste xeito, piden que acuda á Cámara o presidente da Xunta, Alberto Núñez Feijóo, e o conselleiro de Sanidade, Jesús Vázquez Almuiña; e tamén solicitarán que vaian outros colectivos implicados —como colexios médicos— e plataformas de defensa da sanidade pública.
Aínda que a oposición pode constituír esta comisión —algo que quixo resaltar o portavoz do PP en materia sanitaria, Aurelio Núñez Centeo—, o PP ten capacidade de veto no funcionamento, tendo en conta que o plan de traballo debe acordarse no seo da propia comisión e ten a maioría.
Pontón sostivo que non debería haber impedimentos nesta comisión se "non hai nada que ocultar"
Aínda así, os grupos da oposición, adiantándose —como explicou Luís Villares a un eventual bloqueo de comparecencias— rexistrarán, o vindeiro luns a creación da comisión incluíndo, especificamente no seu título, a investigación da morte dun home na Estrada e a subministración de novos fármacos da Hepatite C que, no seu día, foi obxecto de denuncias "por atrasos".
A oposición aspira a esclarecer non só o ocorrido na PAC da Estrada, senón tamén casos como as mortes de enfermos de hepatites C, un caso que xa investiga a xustiza e polo que están imputados por homicidio imprudente dous altos cargos do Sergas.
"QUE TODO O MUNDO TEñA VOZ". "Queremos que todo o mundo teña voz nesta comisión", manifestou, na súa intervención, o portavoz parlamentario socialista, quen tamén apuntou a necesidade de analizar os problemas de pediatría e os cambios nas áreas sanitarias (logo da supresión das comarcais).
Villares advertiu de que o falecemento dun home na PAC da Estrada "foi a pinga que colmou o vaso". "Sabemos que non foi o primeiro, pero esperamos que sexa o último" , subliñou, antes de reprobar a situación "infame" da situación da sanidade e quen criticou a "soberbia" do PP que "non está disposto a escoitar ao país que sofre".
"A política sanitaria de Feijóo está a acabar coa saúde. E a cidadanía está farta e pídenos que reaccionemos", aseverou Villares, quen preguntou se "vale a pena todo este aforro en termos de vidas humanas" para responder que "non" e que "non debería estar en política ninguén" que non o crea.
"Por suposto non temos nada que obxectar, colaboraremos coa oposición para que esta comisión non sexa exclusivamente para deostar ao Goberno da Xunta", subliñou Centeo
"Estamos a falar de algo tan importante como o dereito á saúde das persoas, que é tanto como falar do dereito á vida das persoas", manifestou a deputada nacionalista na rolda de prensa de presentación desta iniciativa. Pontón denunciou que se está "devaluando" a sanidade e fixo fincapé en que o desencadenamento desta comisión foi un feito "gravísimo", á vez que reiterou que levan "moito tempo dicindo que os recortes matan".
FRONTE COMÚN. Na súa intervención, Villares quixo subliñar a unidade da oposición ao redor desta petición, que vén despois de que no pleno do Parlamento do pasado mércores tanto En Marea como BNG expuxesen esta investigación e de que, este xoves, o secretario xeral do PSdeG, Gonzalo Caballero, avanzase contactos neste sentido.
Leiceaga considerou "decepcionante" a resposta do Goberno ante o ocorrido na PAC da Estrada e apostou por dar "luz" sobre o que está a pasar na sanidade pública, algo que para o deputado popular Aurelio Núñez Centeo é, no entanto, unha ocasión máis en que a oposición quere "desprestixiar" a imaxe da sanidade galega, que é o servizo máis valorado pola cidadanía.
Centeo compareceu minutos despois de que a oposición fixéseo no Pazo do Hórreo para confirmar a iniciativa, aínda que aínda falta por rexistrar, o que motivou que o deputado popular evitase pronunciarse polo momento sobre o fondo da comisión. Así, tampouco aclarou se é partidario de que comparezan o presidente da Xunta e/ou o conselleiro de Sanidade, como quere a oposición.
A xuízo do deputado popular, esta comisión deberá servir para pór en valor a sanidade pública galega e, con estas claves, afrontará o PPdeG a investigación parlamentaria proposta pola oposición, que pedirá listas de espera, número de contratos "precarios", contratacións de persoal no verán, situación de pediatría, entre outras cuestións.
Leiceaga tamén apostou por ir paso a paso e confiou en poder dialogar co PP
Pontón apuntou que é preciso analizar "a privatización e precarización e, en definitiva, o desmantelamento" da sanidade pública; mentres que Leiceaga indicou que esta comisión ten "que ser capaz de desvelar o que está a pasar na sanidade pública".
Villares fixou outras cuestións a debater como "todas as persoas invisibles" que "non pagaron medicamentos" tras o copago, as que "non tiñan hemodinámica (en Lugo) as 24 horas" e as que estiveron "nunha lista de espera interminable".
O portavoz de En Marea defendeu que a oposición está "unido no verdadeiramente importante", como é a sanidade. "Vimos en busca de solucións", apuntou, antes de advertir de que "non vale o aforro dun só euro cando ten custo humano".
Villares anticipou que unha das conclusións será a "necesidade de máis recursos", pero indicou que hai que escoitar a todos os colectivos para "saber como" e o "camiño". "Votase a quen votase, a cidadanía non quere un servizo sanitario en que non haxa recursos", sentenciou.
Os TEMPOS DA COMISIÓN. Os grupos da oposición consideran que, a pesar de estar no ecuador da lexislatura, esta comisión "chega a tempo", a pesar de experiencias previas como a das caixas que leva varios anos paralizada sen un ditame. As conclusións dunha comisión de investigación poden ser obxecto de remisión á xustiza se se detectan indicios de delito e nelas hai obrigación de veracidade nas comparecencias.
Pontón sostivo que non debería haber impedimentos nesta comisión se "non hai nada que ocultar", mentres que Leiceaga tamén apostou por ir paso a paso e confiou en poder dialogar co PP para establecer un programa que permita desenvolver os traballos.
REACCIÓN DO PP. Núñez Centeo, que saudou que o regulamento do Parlamento permita este tipo de comisións "a diferenza" doutras administracións (en referencia a Vigo ou A Coruña), lamentou que a oposición "intente dar unha imaxe de desprestixio á sanidade pública", pero considerou que servirá para "desmontar as falacias" que se verten nesta materia.
Así, avanzou cuestións como que o Galicia ten "o orzamento máis alto en sanidade, a maior porcentaxe da historia, e as mellores listas de espera". Tamén conta cunha Lei de garantías de esperas máximas e a libre elección de médico.
"Por suposto non temos nada que obxectar, colaboraremos coa oposición para que esta comisión non sexa exclusivamente para deostar ao Goberno da Xunta", subliñou Centeo, quen non quixo entrar no caso concreto da PAC da Estrada, que se está investigando por parte de Inspección Sanitaria e cuxa resolución entende que sería o "primeiro" que habería que saber antes da comisión de investigación.
