Pablo Lesuit, Igloo ou Santi Araújo son algúns dos artistas que actuarán na sesión vermú do festival PortAmérica, segundo deu a coñecer este xoves a organización. Aínda que o festival -con artistas como Nathy Peluso, Xoel López ou WOS- celebrarase na Azucreira de Portas, Caldas non quedará sen protagonismo.
Ademais da zona de acampada, que estará situada por primeira vez, na Carballeira, o recinto de A Tafona acollerá concertos ao mediodía, con acceso gratuíto, tanto para os asistentes ao festival como para os veciños e quen queira achegarse. Trátase do novo formato "sesión vermú", que terá lugar durante as mañás do sábado 4 e do domingo día 5 de xuño, cunha "mestura de estilos para todos os gustos", pois, explica Esmerarte, "o público asistente poderá gozar de grandes artistas do panorama actual que se encargarán de pór ritmo a ambas as sesións matutinas" con estilos como "ndie, tonada, folk…".
O sábado actuarán Marilia Monzón, Marisa Vale Roso, Santi Araújo e Pablo Lesuit, mentres que o domingo están anunciados Mavica, Sarria e Igloo, que xogarán en casa.
As entradas para o festival da Azucreira, previsto para os días 2, 3 e 4 e de xuño, continúan á venda a 30 euros a entrada diaria e a 65 o bono, aínda que tamén continúan sendo válidas as adquiridas para o festival de 2020, que non chegou a celebrarse. Así mesmo, están dispoñibles tamén os tickets para a acampada (a 20 euros por persoa para catro días) e para as cinco liñas de buses que comunicarán Portas con Pontevedra, Cambados e Vilagarcía, A Coruña, Santiago de Compostela e Vigo, con diversos prezos.
