Unha persoa resultou ferida ao chocar un turismo e unha furgoneta no quilómetro 41 da AP-53, ao seu paso polo municipio pontevedrés de Lalín.
Segundo informou o CIAE 112 Galicia, varios particulares informaron sobre as 17.30 horas do accidente e indicaron que a furgoneta acababa de dar varias voltas de campaña.
Tras recibir o aviso, os operadores do Centro Integrado de Atención ás Emerxencias de Galicia informaron aos Bombeiros de Silleda, ao GES de Lalín, aos axentes da Garda Civil de Tráfico e da Policía Local e aos servizos sanitarios. Ademais, o accidente foi notificado ao Centro de Xestión de Tráfico e ao persoal de mantemento da vía.
Unha vez no punto, os bombeiros comprobaron que a persoa que circulaba na furgoneta estaba ben e fóra do vehículo. A isto engadiron que no accidente tamén se viu implicado un coche, que estaba situado algo máis adiante na estrada, e no que viaxaba unha persoa que tivo que ser atendida polo persoal da ambulancia no lugar dos feitos.
SAíDA DE VÍA EN VILAGARCÍA. Así mesmo, media hora despois, tivo lugar unha saída de vía dun turismo no municipio de Vilagarcía de Arousa, tamén na provincia de Pontevedra.
O CIAE 112 Galicia detallou que un particular contactou coa central para solicitar asistencia médica para unha persoa que tivera un accidente co seu vehículo na Avenida de López Ballesteros.
Tras iso, o CIAE-112 Galicia informou aos profesionais de Urxencias Sanitarias de Galicia - 061, á Policía Local, aos Bombeiros de Vilagarcía e aos membros de Protección Civil.
