Os axentes da Policía Local de Cuntis poden realizar a súa labor de patrullar polos 79,8 quilómetros cadrados de superficie con que conta este municipio desde este mércores, día no que este servizo incorporou ao seu parque móbil un novo vehículo.
No acto de entrega do coche, celebrado fronte á fachada da Casa Consistorial ao redor das 12.00 horas, estivo presente o deputado provincial de Centros de Investigación e concelleiro de caldas de Reis, Manuel González; o alcalde, Manuel Campos, e varios representantes máis da institución local e da Policía.
O vehículo, da marca Nissan, é un modelo DS 4. Para facer posible a operación, a Deputación de Pontevedra realizou unha achega económica que ascende a 15.000 euros, con cargo á Liña 1 do Plan Concellos. O Concello, pola súa banda investiu unha partida que ascende a 10.000 para financiar as reformas destinadas a adaptalo ao uso ao que será destinado.
"A incorporación fai posible a renovación dunha parte fundamental do equipamento de traballo da Policía Local, como é dispoñer dun coche patrulleiro actualizado, pois o anterior era moi antigo e sufría frecuentes avarías", expón a Administración local nunha valoración que podería ser extensible a outros concellos da comarca, cuxas policías se atopan actualmente nunha situación similar.
