Instalar bancos e aparatos de xogos para os nenos e dotar a praia fluvial de Liñares de novas zonas axardinadas son os labores que levarán a cabo os dezaseis veciños da Estrada en situación de desemprego que resulten seleccionados para participar no taller que promove a Xunta en colaboración coa Administración local. Son dous as especialidades: xardinería e carpintería.
Realizarán o seu labor durante un ano e comezarán o 13 de agosto. Son dous os obxectivos desta intervención: mellorar os espazos públicos e dotar de capacidades os alumnos para facilitar a súa inclusión no mercado laboral.
