O PSOE denunciou ante a Xunta Electoral Provincial de Pontevedra un envío postal realizado polo PP de Moraña no que, a través de cartas remitidas a varios veciños do municipio, solicita o seu voto e adxunta de agasallo participacións para o sorteo da Lotería de Nadal. O envío inclúe a propaganda electoral do PP, unha carta asinada pola alcaldesa de Moraña, Luisa Piñeiro, e as papeletas do Congreso e do Senado.
Os socialistas aseguran que estes feitos incumpren o artigo 50 e seguintes da lei electoral, que establecen que os poderes públicos non poden influír na orientación de voto dos electores e "moito menos", engaden, regalando lotería.
O PSOE esixe que a Xunta Electoral abra un expediente sancionador ao PP para coñecer "todos os detalles e o alcance" deste envío electoral e confían en que se lles impoña unha sanción "exemplarizante". Denuncian, ademais, que Piñeiro "xa se distinguiu noutras ocasións pola súa falta de transparencia e escrúpulos á hora de alcanzar os seus obxectivos".