O PSOE de Lalín afirma estar "rotundamente" contra os "macroparques eólicos proxectados para o noso concello, porque afectan directamente ao noso modelo económico e ambiental e teñen un impacto visual e auditivo que afecta directamente á xente e incluso á vila".
"Non lle imos permitir a Crespo que siga mentindo nos medios e nas reunións cos veciños", advertiron os representantes do partido do puño e a rosa. "Estes megaparques non os fai o Partido Socialista", agregaron.
O Ministerio de Transición Ecolóxica só poxa a enerxía e, a partir de aí, son as empresas gañadoras das poxas as que deciden onde instalar os parques, está obrigado, en primeira instancia a admitilos todos a trámite, e é despois cando se poden paralizar, apunta o PSOE.
Esta formación recorda que o Goberno, con Rajoy á fronte, realizou tres poxas e nunha a gañadora foi Alfanara, a empresa que, con outro nome, pretende impulsar os dos Porcallos e Val do Folgoso.
"Tanto ten quen goberne porque son as empresas as que deciden a localización, non é o PSOE o que quere traelo para Goiás, e por iso non lle imos permitir a Crespo que siga mentindo nesta cuestión", recalca o PSOE.
