A Garda Civil investiga ao condutor dun vehículo que foi detectado por un radar en Caldas de Reis circulando a 163 quilómetros por hora nun tramo limitado a setenta, á altura do quilómetro 230,800 da estrada N-640. De feito, a patrulla encargada de notificar as infraccións non puido interceptalo, segundo informou este mércores a Benemérita nun comunicado, polo que se iniciou unha investigación.
Tras comprobar que o vehículo está a nome dunha muller, con domicilio na poboación asturiana de Navia, o instituto armado requiriu a colaboración do Subsector de Tráfico de Asturias, ao obxecto de pescudar quen conducía o vehículo no momento de ser detectado cometendo a infracción, o pasado 16 de marzo. A titular indicou que o coche o conduce habitualmente o seu fillo, de vinte anos, que traballa de xeito eventual na provincia de Pontevedra, e reside, tamén de forma eventual, na Coruña.
Tras localizalo, este martes procedeuse á súa investigación por un delito contra a seguridade viaria, tendo en conta que excede en máis de 80 km/h o límite permitido en vía interurbana. De ser considerado culpable pola autoridade xudicial, pode enfrontarse a unha pena de prisión de 3 a 6 meses, multa de 6 a 12 meses ou traballos en beneficio da comunidade de 31 a 90 días, que leva aparellada a privación do dereito a conducir vehículos a motor e ciclomotores por tempo superior a un e ata catro anos.
"Este tipo de condutas constitúe un dos principais factores de risco que concorren nos accidentes en xeral, e dos máis graves en particular, polo que son un grave problema de seguridade viaria, non só para os responsables senón tamén para o resto de usuarios da vía", recorda a Garda Civil no seu escrito.
