Se se cumprisen os compromisos adquiridos pola empresa á que o Goberno local de Cuntis adxudicoulle o proxecto, a renovación integral da rede eléctrica nos núcleos do rural deste municipio será unha realidade nun prazo de catro meses. Os traballos comezarán en setembro e a súa conclusión está prevista antes de que finalice o ano.
Instalacións Eléctricas Terca é a empresa que gañou o concurso posto en marcha polo Concello, ao que se presentaron 16 firmas, cuxos orzamentos oscilaron entre 359.070 e 470.207 euros.
Reforma do alumeado público nas zonas rurais do concello de Cuntis é o nome da iniciativa, a execución da proposta seleccionada suporá un investimento de 434.886 euros e nela figuran unha serie de melloras con respecto ás condicións establecidas no prego de contratación, como a inclusión de 100 luminarias máis das previstas, a ampliación da duración da de garantía de dous a seis anos, o mantemento preventivo das instalacións durante o mesmo período de tempo e a redución de seis a catro meses do prazo para realizar os traballos.
A rede de iluminación do municipio de Cuntis conta con 1.800 puntos de luz, distribuídos en 137 cadros de mando de protección e medida, que serán reformados, uns e substituídos, outros, porque moitos deles xa non contan co interruptor diferencial, ou está inutilizado, e tampouco dispoñen de toma de terra, ademais de presentar graves defectos estruturais nalgúns postes de apoio, que se atopan cuarteados (os de formigón) e o seu reforzo de aceiro está en contacto co aire, circunstancia que acelera a súa degradación.
No exahustivo foi elaborado polo Concello para proxectar esta actuación tamén figura que hai un condutor eléctrico coa cuberta cuarteada, o que provoca constantes avarías, sobre todo cando chove ou hai un alto grao de humidade.
Ademais de mellorar o servizo e facer posible a instalación dunha rede nova con garantías para varias décadas, o Goberno local tamén xustifica este proxecto porque propiciará un aforro na factura derivada do consumo.
No mes de xuño do ano 2017, en Pleno deu luz verde a este proyecyto, que contou co respaldo unánime de todos os concelleiros.
O alcalde, Manuel Campos, enmarca esta intervención nunha política destinada a mellorar a calidade de vida dos veciños cuxos domicilios están situados no rural. Tendo en conta o desembolso económico que suporá, é unha das máis ambiciosas da que serán executadas este mandato.
