O BNG de Caldas de Reis afirmou o pasado mércores que o propio alcalde, Juan Manuel Rei, confirmara ao portavoz local da formación nacionalista que os pozos filtrantes construídos na ribeira do río Umia aínda non se puxeron en funcionamento, a pesar de ser inaugurados hai xa dous anos. O rexedor negou este xoves tal afirmación: "Iso é mentira. As bombas funcionaron sempre", afirmou.
Rei si admite que "dende hai quince días" as bombas están paradas debido a unha "obturación nos filtros", contratempo que se está tratando de arranxar, coa previsión de poder recuperar o sistema nunhas dúas semanas. A pesar de todo, o alcalde garante a calidade da auga. "Tódalas analíticas a día de hoxe saen perfectas", insiste.
O gabinete de crise creado para facer un seguimento ao problema que causa no río a presenza da microcistina ten previsto celebrar esta mañá unha reunión "informal" para "preparar ben a entrevista do luns", sinala o rexedor, referíndose ao encontro na delegación da Xunta en Pontevedra ao que o gabinete local foi convocado.
En principio, por parte do Goberno autonómico, asistirán o delegado en Pontevedra, os xefes territoriais de Medio Ambiente e Sanidade e técnicos. No entanto o comité reclamou a presenza de interlocutores de máis peso. Sen ir máis lonxe, solicita unha entrevista co presidente da Xunta, Alberto Núñez Feijóo.