O alcalde de Caldas de Reis, Juan Manuel Rey, asinou este xoves a resolución na que figura a delegación de competencias entre os membros do Goberno local para a dirección dos diferentes servizos municipais, da que dará conta na próxima sesión plenaria da Corporación municipal.
Manuel González López farase cargo das competencias en materia de Medio Ambiente, Obras, Infraestruturas e Persoal. Tamén se ocupará das parroquias de San Clemente e San Andrés.
Jacobo Pérez Gulín, unha das novas incorporacións, que ocupou o terceiro posto na candidatura do PSOE, asumirá Economía, Emprego, Facenda, Consumo, Xuventude e Deporte. O que fora alcalde pedáneo da entidade local menor de Arcos da Condesa durante o mandato anterior tamén será o responsable de representar a esta parroquia.
Pola súa banda, María Inés Fuentes Vidal dirixirá as áreas de Benestar Social, Saúde, Igualdade e Participación Cidadá, ademais de ser de novo a responsable a parroquia de Godos.
María López Buceta encargarase de Cultura, Educación, Infancia e Parques e Xardíns, e será a representante da Administración local en Santa María e Santo Tomás.
O segundo novo concelleiro do equipo de goberno presidido por Juan Manuel Rey, Juan Carlos Ortigueira Lemos, farase cargo das áreas de Seguridade Cidadá e de Medio Rural, así como da parroquia de Saiar.
O alcalde de Caldas de Reis mantén as competencias directas nas áreas que xa xestionou anteriormente, que son as de Urbanismo, Turismo e Comercio, ademais de ter ao seu cargo a interlocución directa de dúas parroquias do municipio, as de Bemil e Carracedo.
