O resultado da votación na que foi rexeitado o orzamento de Catoira repetiuse este xoves na cuestión de confianza presentada polo seu alcalde, Alberto García, para sacar adiante o documento: obtivo o respaldo dun edil do seu grupo (PSOE) e dos tres do PP. Insuficientes ante a negativa de tres socialistas e o mesmo número do BNG.
Era o resultado esperado por todos, e agora ábrese un prazo dun mes, no que o orzamento quedaría aprobado automaticamente se durante ese tempo non se chegase a presentar unha moción de censura. O Pleno durou pouco máis de cinco minutos, e ao finalizar, os portavoces expresaron as súas valoracións, que seguen a liña das realizadas anteriormente.
Abriu a quenda Daniel Touriño, que en nome dos tres edís do PSOE enfrontados ao alcalde dixo que non están en desacordo co orzamento, pero non aceptan a proposta de destinar unha partida para que os tres grupos conten cun concelleiro liberado, e tamén denunciou que o rexedor non lles deixou o máis mínima marxe de manobra mentres estiveron nas súas áreas de goberno.
Touriño apuntou que contan co respaldo da executiva provincial do PSOE. "Somos uns mandados", dixo antes de afirmar que acatarán a súa decisión.
Iván Caamaño (PP) argumentou que apoia o documento porque se atribúe a realización de xestións ante a Xunta que permitiron captar varias axudas, e descartou que houbese un acordo para aprobar as tres liberacións.
O popular deu aos socialistas díscolos o mesmo consello que lles deu hai varios meses o alcalde, e recomendoulles esperar, presentarse a unhas eleccións e gañalas se queren gobernar, ademais de asegurar que dispón do respaldo do PP provincial.
Logo de 42 anos no Concello (como edil e alcalde), Xoán Castaño mantivo que Alberto García considera a Administración local "unha leira" e pediulle que dimita "por dignidade política", xa que ten en contra á maioría da Corporación e do seu grupo.
O nacionalista reiterou a disposición do BNG de negociar unha saída co PSOE, pero sempre que o alcalde non figure na fórmula que puidesen pactar.
De Xoán Castaño afirmou que logo de ter "merodeado" polo Concello cando foi alcalde, levou documentos que, supón, debe gardar nun "baúl", entre os que figuran expedientes que non deberían saír da Casa Consistorial.
Unha vez que transcorra un mes, anunciou que adoptará a medida de expulsar aos tres edís do grupo municipal, ademais de esixir explicacións á executiva provincial pola súa reiterada ausencia de apoio.
